Дотраен развивач

 

„Коцки“

Не сум пишал веќе подолго време.

 

До развивачот е.

 

Се развија веќе премногу фотографии, а квалитетот на развивачот потемнува со време. Колку повеќе потемнува развивачот толку подолго е времето на развивање една фотографија. Колку е понов развивачот, времето на развивање на една фотографија е пократок, а квалитетот подобар.

 

Хартијата за фотографија која најчесто се употребува за црно-бела фотографија е обложена со сребрен бромид или сребрен хлорид, или е комбинација од обете. Развивачот пак е комбинација од метол, фенидон, димензон и хидрокинон. Всушност, овие состојки се еден вид на презервативи за да спречат оксидација преку воздухот, алкални соединенија за да го активираат развивачот и состојка која го осигурува развивачот да делува само на експонирани сребро-халидни кристали. Главните карактеристики на развивачот се активност, брзина на развивање и ефектите на градацијата, количество на зрно и острина што филмот ги дава.

 

Кога ќе се истроши развивачот, квалитетот на фотографијата се намалува, или во најмала рака, потребен е подолг проток на време за да се добие посакуваниот квалитет.

 

Штом се истроши развивачот, се прави нова смеса.

 

И сѐ така одново.

 

***

 

Сѐ тоа е една хемиска игра помеѓу светлината и темнината. Игра со веќе однапред поставени правила на интеракција, врзување, одбивање, тензија, фиксација, пропаѓање и одново создавање.

 

Изморен сум од неа. Сакам надвор од играта. Не ми се игра повеќе.

 

Но, Бог не си игра со коцки.